Ibrahimaj në takim me rrjetet e supermarketeve: Po ndërtohet “radari” i çmimeve

Ndërtimi i platformës “PriceWatch Albania – Pasqyra e Çmimeve” po hyn në një fazë të re, me përfshirjen e rrjeteve kryesore të supermarketeve. Ministrja e Ekonomisë dhe Inovacionit, Delina Ibrahimaj, ka bërë të ditur se puna po vijon me drejtuesit e rrjeteve të mëdha të shitjes me pakicë, me synim krijimin e një sistemi që do t’u japë qytetarëve informacion më të qartë dhe të përditësuar mbi çmimet e produkteve bazë.

“Me drejtuesit e rrjeteve kryesore të supermarketeve, vijojmë punën për ndërtimin e platformës që do të bëjë më transparente çmimet e produkteve bazë dhe do t’u mundësojë konsumatorëve t’i krahasojnë ato lehtësisht”, shprehet Ibrahimaj.

Sipas ministres, bashkëpunimi me supermarketet është një element i rëndësishëm për funksionimin e platformës, pasi informacioni mbi çmimet duhet të jetë i rregullt, i përditësuar dhe i aksesueshëm për konsumatorët. "PriceWatch Albania – Pasqyra e Çmimeve" është një platformë e prezantuar nga qeveria si një instrument për rritjen e transparencës në treg. Sipas njoftimeve të mëparshme të Ibrahimajt, platforma pritet të lançohet gjatë muajit shtator dhe do të integrohet në “PasqyrAlbania”.

Qëllimi kryesor është që konsumatorët të mund të shohin çmimet e produkteve bazë, t’i krahasojnë ato në pika të ndryshme shitjeje dhe të identifikojnë se ku një produkt mund të blihet me çmim më të ulët.

Nisma nuk synon vetëm t’i japë konsumatorit një listë çmimesh. Sipas shpjegimeve të dhëna nga ministrja, mekanizmi do të përdoret edhe për të ndjekur zinxhirin e formimit të çmimit, nga importi ose prodhimi deri në pikën e shitjes. Në këtë mënyrë, synohet të identifikohet se në cilën hallkë të zinxhirit krijohen diferencat e çmimeve dhe ku mund të shfaqen raste abuzimi.

Një nga elementet e rëndësishme të mekanizmit të ri është raportimi i çmimeve nga bizneset e tregtisë me shumicë dhe pakicë. Të dhënat e raportuara do të përdoren për krijimin e një pasqyre më të qartë të çmimeve në treg dhe, për konsumatorët, do të përkthehen në mundësinë për të krahasuar çmimet e produkteve bazë.

Përfshirja e rrjeteve kryesore të supermarketeve në këtë fazë lidhet pikërisht me nevojën për të ndërtuar një sistem funksional, ku informacioni të jetë sa më pranë çmimit real me të cilin përballet konsumatori në pikën e shitjes.