“Dyfisho Sipërmarrjen Tënde”/ Hapet platforma online për bizneset, ja si mund të aplikojnë

Bizneset e vogla dhe të mesme që kërkojnë financim për të zgjeruar apo modernizuar aktivitetin e tyre tashmë mund të shprehin interesin për programin “Dyfisho Sipërmarrjen Tënde” përmes një platforme të automatizuar në e-Albania. Ministrja e Ekonomisë dhe Inovacionit, Delina Ibrahimaj ka bërë me dije se platforma e re është vënë në funksion me qëllim thjeshtimin e procedurave dhe ndjekjen online të procesit, që nga momenti i aplikimit fillestar deri në përgatitjen e biznesit për fazën e financimit bankar. Sipas ministres, sistemi i ri është konceptuar që sipërmarrësit të kenë një proces më të lehtë dhe të mund të marrin asistencën e nevojshme gjatë përgatitjes së aplikimit.

Për të nisur procedurën, bizneset duhet të identifikohen në portalin e-Albania dhe të kërkojnë shërbimin “Shprehje interesi për ‘Dyfisho Sipërmarrjen Tënde’”. Në këtë fazë kërkohet plotësimi i të dhënave të biznesit, përfshirë NIPT-in, si dhe informacioni fillestar për projektin ose investimin që synohet të realizohet. Platforma u jep gjithashtu aplikuesve mundësinë për të kontrolluar në internet ecurinë e kërkesës dhe statusin e saj përgjatë procesit. Ministria bën të ditur se mbështetja nuk kufizohet vetëm te administrimi online i aplikimit. Bizneset asistohen edhe në përgatitjen e dokumenteve dhe informacionit që nevojiten për fazën e mëtejshme, me synimin që të jenë të përgatitura kur t’i drejtohen bankës për kredi. Interesi për programin ka qenë i konsiderueshëm. Sipas të dhënave të bëra publike nga ministrja Ibrahimaj, mbi 1,700 biznese kanë shprehur interes deri tani, ndërsa 720 aplikime janë duke u trajtuar nga ekipet e Ministrisë së Ekonomisë dhe Inovacionit.

Të dhënat e mbledhura gjatë kësaj faze tregojnë se pjesa më e madhe e sipërmarrjeve po kërkon financim për rritjen e aktivitetit. Rreth 57 për qind e bizneseve që kanë shprehur interes kanë deklaruar se synojnë zgjerimin e aktivitetit, ndërsa 21 për qind kanë planifikuar investime në makineri dhe pajisje.

Programi “Dyfisho Sipërmarrjen Tënde” është krijuar për të lehtësuar aksesin e ndërmarrjeve të vogla dhe të mesme në kredi, duke parashikuar garanci sovrane të shtetit për financime deri në 2 milionë euro. Afati i maturimit të kredive mund të shkojë deri në 10 vjet.