Alarm në Greqi/ "Fluturojnë" çmimet e karburanteve, çfarë pritet të ndodhë në shtator

Çmimet e karburanteve në Greqi kanë kaluar një tjetër prag të rëndësishëm, me benzinën që tashmë shitet mesatarisht mbi 2 euro për litër, ndërsa sinjalet nga tregu paralajmërojnë rritje të mëtejshme në ditët në vijim.

Sipas të dhënave të raportuara nga mediat greke, çmimi mesatar kombëtar i benzinës pa plumb ka arritur në rreth 2.015 euro për litër, ndërsa nafta po tregtohet mesatarisht me rreth 2.02 euro për litër.

Por rritja mund të mos ketë përfunduar. Gjatë javës së fundit, çmimet nga rafineritë janë rritur me rreth 11-12 cent për litër për naftën dhe 6-7 cent për benzinën. Një pjesë e kësaj rritjeje ende nuk është reflektuar te konsumatori dhe pritet të shfaqet në pompat e karburantit gjatë ditëve të ardhshme.

Frika më e madhe lidhet me 1 shtatorin, kur përfundojnë masat aktuale të mbështetjes nga qeveria greke. Nëse subvencionet nuk zgjaten, përfaqësuesit e sektorit paralajmërojnë se çmimi i benzinës mund të arrijë deri në 2.20 euro për litër, ndërsa nafta mund të shkojë në rreth 2.25 euro.

Por shtrenjtimi i karburanteve nuk kufizohet vetëm te xhepi i drejtuesve të automjeteve. Nafta është një kosto bazë për transportin e mallrave, ndaj një rritje e saj mund të përcillet gradualisht në çmimet e ushqimeve, produkteve të konsumit dhe shërbimeve.

Qeveria greke po shqyrton mundësinë e zgjatjes së masave mbështetëse për naftën edhe pas fundit të gushtit. Ndërkohë, vëmendja është përqendruar te Panairi Ndërkombëtar i Selanikut, ku kryeministri Kyriakos Mitsotakis pritet të prezantojë masa të reja lehtësuese për familjet, pensionistët, shtresën e mesme dhe bizneset e vogla.

Nëse subvencionet nuk vazhdojnë dhe çmimet ndërkombëtare mbeten në nivele të larta, shtatori mund të sjellë një tjetër goditje për konsumatorët grekë, me karburantin që rrezikon të kthehet në një prej faktorëve kryesorë të presionit mbi koston e jetesës.