Zgjidhja e koncesionit të Aeroportit të Vlorës, Pacolli paralajmëron arbitrazh ndërkombëtar

Procedura e nisur nga Ministria e Infrastrukturës dhe Energjisë për zgjidhjen e kontratës së koncesionit të Aeroportit Ndërkombëtar të Vlorës mund të kthehet në një tjetër çështje me kosto të lartë për financat publike shqiptare. Reagimi ka ardhur nga biznesmeni Behgjet Pacolli, një prej investitorëve kryesorë të projektit dhe pronar i MABCO Constructions SA, i cili deklaron se kompania nuk ka marrë ende asnjë njoftim zyrtar nga autoritetet shqiptare. Sipas tij, informimi përmes mediave për një investim strategjik përbën një shkelje të standardeve institucionale. Pacolli paralajmëron se, nëse procedura për zgjidhjen e kontratës konfirmohet zyrtarisht, kompania do t’i drejtohet arbitrazhit tregtar ndërkombëtar për të kërkuar dëmshpërblim. Ai vlerëson se ekspozimi financiar i MABCO-s kalon 320 milionë euro, pa përfshirë fitimin e munguar dhe kostot ligjore.

Në deklaratën e tij, investitori pretendon se kompania kishte përfunduar pothuajse të gjitha detyrimet kontraktore dhe ndodhej pranë fazës së certifikimit të aeroportit. Ai akuzon institucione shtetërore dhe struktura që, sipas tij, kanë vepruar në mënyrë arbitrare duke penguar hyrjen e kompanisë në kantier dhe përfundimin e projektit, madje duke lejuar dëmtimin dhe humbjen e pajisjeve. Pacolli argumenton se shteti shqiptar nuk mund të përdorë si shkak për zgjidhjen e kontratës vonesat që, sipas tij, janë krijuar nga vetë institucionet publike. Ai i referohet gjithashtu Marrëveshjes Dypalëshe për Mbrojtjen e Investimeve mes Shqipërisë dhe Zvicrës, duke theksuar se MABCO do të mbrojë të drejtat e saj me të gjitha mjetet juridike në dispozicion.

Deri tani, Ministria e Infrastrukturës dhe Energjisë nuk ka publikuar një qëndrim të detajuar mbi pretendimet e investitorit dhe mbi hapat e mëtejshëm të procedurës për zgjidhjen e kontratës.

Një arbitrazh i mundshëm do të kishte ndikim jo vetëm financiar, por edhe në perceptimin e klimës së investimeve dhe sigurisë juridike për projektet strategjike në Shqipëri.