Të rinjtë rikthehen në fshat, kjo është skema që po i josh drejt blegtorisë

Blegtoria duket se po kthehet në një nga alternativat më të preferuara për të rinjtë që zgjedhin të investojnë në fshat. Të dhënat e Skemës Kombëtare të Mbështetjes për vitin 2026 tregojnë një interes të konsiderueshëm për zgjerimin e fermave dhe rritjen e kapaciteteve prodhuese. Në total janë regjistruar 414 aplikime nga fermerë të rinj, me investimet që janë përqendruar kryesisht në tre drejtime: kafshë, makineri bujqësore dhe ambiente për mbajtjen e tyre.

Nga 414 aplikimet e dorëzuara, 223 lidhen me blerjen e kafshëve, duke përbërë kategorinë më të madhe të interesit. Në vendin e dytë renditen investimet për makineri bujqësore, me 164 aplikime, ndërsa 27 aplikime kanë të bëjnë me ndërtimin ose përmirësimin e ambienteve ku mbahen kafshët. Shifrat tregojnë se për një pjesë të konsiderueshme të fermerëve të rinj, investimi fillestar lidhet drejtpërdrejt me rritjen e tufës dhe fuqizimin e aktivitetit blegtoral.

Një nga risitë e Skemës Kombëtare të Mbështetjes në Bujqësi është përfshirja e fermerëve të rinj përmes granteve që mund të arrijnë deri në 10 mijë euro. Synimi i kësaj mbështetjeje është nxitja e investimeve në zonat rurale dhe tërheqja e të rinjve drejt sektorit bujqësor, duke i dhënë më shumë mundësi për zgjerimin dhe modernizimin e fermave. Sipas të dhënave të skemës, nga fondi total prej 5.2 miliardë lekësh, 2.5 miliardë lekë janë përcaktuar për mbështetjen e investimeve.

Për investimet në ferma bujqësore dhe blegtorale, mbështetja mund të arrijë në 70% të vlerës së faturave tatimore, me një kufi deri në 1 milion lekë për subjekt. Për ndërtimin apo rikonstruksionin e staneve dhe pajisjet që synojnë përmirësimin e kushteve të mbajtjes së kafshëve, mbështetja përcaktohet po në masën 70%, por me një tavan deri në 3 milionë lekë për subjekt. Ndërkohë, për makineri, pajisje dhe mjete që shërbejnë për mekanizimin dhe modernizimin e punës në fermat bujqësore e blegtorale, skema parashikon mbështetje në masën 50%, nga 50 mijë deri në 500 mijë lekë për subjekt.

Përtej numrit të aplikimeve për blerjen e kafshëve, shifrat tregojnë edhe një tjetër tendencë: fermerët e rinj po kërkojnë të kombinojnë prodhimin me pajisje dhe teknologji që mund të rrisin kapacitetet e fermës. Janë 164 aplikime për makineri bujqësore, çka tregon se krahas rritjes së aktivitetit, një pjesë e fermerëve po synon edhe modernizimin e mënyrës së punës. Kjo prirje vjen në një kohë kur mbështetja për sektorin e blegtorisë është rritur dhe kriteret e përfitimit janë lehtësuar për fermerët. Nëse kjo tendencë do të vijojë, investimet e fermerëve të rinj mund të shërbejnë jo vetëm për shtimin e prodhimit, por edhe për një ndryshim gradual të profilit të bujqësisë në zonat rurale, me më shumë mekanizim, pajisje dhe kapacitete prodhuese.