Reforma e pensioneve po afron, ja çfarë pritet të ndryshojë

Sistemi i pensioneve në Shqipëri pritet të përballet me ndryshime të reja, ndërsa zhvillimet demografike po shtojnë presionin mbi skemën publike. Rënia e lindshmërisë, plakja e popullsisë dhe ndryshimi i raportit mes personave që kontribuojnë dhe atyre që marrin pension po e bëjnë të nevojshëm rishikimin e sistemit.

Eksperti i tregut të sigurimeve, Elvis Ponari, sjell në vëmendje ndryshimet që pritet të diskutohen në kuadër të reformës së pensioneve dhe sfidat me të cilat përballet skema shqiptare. Sipas tij, një nga çështjet që pritet të jetë në qendër të diskutimeve është mosha e daljes në pension. Reforma e vitit 2014 parashikoi një rritje graduale të moshës së pensionit, me synimin që ajo të arrijë në 67 vjeç për të dyja gjinitë në vitin 2056. Por ndryshimet demografike mund të kërkojnë rishikimin e kësaj politike në të ardhmen, veçanërisht për shkak të rritjes së jetëgjatësisë dhe tkurrjes së numrit të kontribuesve në sistem.

Një tjetër element që pritet të ndryshojë është mënyra e indeksimit të pensioneve. Në vend të një rritjeje të njëjtë për të gjithë pensionistët, synohet që pensionet më të ulëta të kenë një rritje më të madhe, ndërsa pensionet më të larta të përfitojnë një rritje më të moderuar. Në diskutim është edhe periudha e kontributeve, me synimin për ta afruar skemën shqiptare me modelet europiane dhe për të forcuar lidhjen mes viteve të punës, kontributeve të paguara dhe pensionit që përfitohet në fund të karrierës.

Reforma po përgatitet në bashkëpunim me institucione ndërkombëtare, mes tyre Banka Botërore dhe Fondi Monetar Ndërkombëtar. Sipas planifikimit, drafti pritet të bëhet publik në fund të vjeshtës dhe të kalojë në konsultim publik në fillim të vitit 2027. Më pas, ndryshimet pritet të ndjekin procedurat përkatëse ligjore dhe parlamentare.