Një klikim për të kontrolluar qeverinë? “Pasqyrë Albania”, platforma e re e transparencës

Qytetarët pritet të kenë së shpejti në dispozicion një platformë të re digjitale, përmes së cilës do të mund të informohen mbi investimet publike, të monitorojnë ecurinë e aplikimeve dhe ankesave të tyre, si dhe të japin mendimin për vendimmarrjen publike. “Pasqyrë Albania” është projekti i ri i qeverisë, i cili synon të përqendrojë në një hapësirë të vetme informacionin dhe shërbimet që lidhen me marrëdhënien mes qytetarëve dhe institucioneve publike. Platforma u prezantua nga kryeministri Edi Rama gjatë një takimi me ekspertët e AKSHI-t, të cilët po punojnë për konfigurimin e saj. Sipas Ramës, ideja për këtë nismë vjen pas reflektimit mbi protestat e fillimqershorit, me synimin për të rritur transparencën dhe për të përmirësuar komunikimin mes administratës dhe qytetarëve. Funksionimi i platformës do të mbështetet në katër shtylla. Përmes rubrikës “Shih”, qytetarët do të kenë mundësi të kontrollojnë investimet publike në zonën ku banojnë, të ndjekin ecurinë e projekteve dhe të njihen me prioritetet e qeverisë. Rubrika “Kupto” do të ofrojë informacion mbi vendimet e bashkive dhe këshillave bashkiakë, duke përfshirë edhe një asistent virtual që do të ndihmojë në përmbledhjen dhe kuptimin e vendimmarrjes vendore. Një rëndësi e veçantë i është kushtuar edhe ndjekjes së kërkesave administrative. Duke u identifikuar përmes llogarisë në e-Albania, qytetarët do të mund të kontrollojnë se në cilën fazë ndodhet aplikimi i tyre dhe cili institucion është përgjegjës për trajtimin e tij. Nëse afatet ligjore për marrjen e përgjigjes tejkalohen, platforma do të dërgojë njoftim me SMS, ndërsa qytetarët do të mund të depozitojnë një ankesë, e cila do të pajiset me një kod unik për të mundësuar gjurmimin e saj deri në përfundim të procesit. Përmes shtyllës “Bashkëvendos”, qytetarët do të kenë mundësi të përfshihen në konsultimet publike dhe të shprehin qëndrimet e tyre për projektakte dhe nisma të ndryshme. Një tjetër element i platformës është “Flamingo Mirror”, një hapësirë e dedikuar për projektet madhore dhe çështjet me interes të lartë publik, ku synohet të ofrohet informacion i verifikuar, të rritet transparenca dhe të luftohet dizinformimi. Platforma do të mund të përdoret si nga kompjuteri, ashtu edhe nga telefoni celular, përmes faqes zyrtare dhe aplikacioneve për Android dhe iOS.