Nafta "ndez" inflacionin, çmimet rriten në disa sektorë

Inflacioni në Shqipëri u ngadalësua lehtë gjatë muajit gusht, por vijon të qëndrojë mbi objektivin e Bankës së Shqipërisë. Sipas të dhënave të INSTAT, rritja vjetore e çmimeve arriti në 3.2%, nga 3.4% që ishte në korrik. Ky është muaji i tretë radhazi që inflacioni qëndron mbi objektivin prej 3% të Bankës së Shqipërisë. Krahasuar me gushtin e vitit të kaluar, rritja më e madhe e çmimeve është regjistruar në grupin “Transporti”, ku çmimet u rritën me 12%. Aktualisht, në tregun vendas litri i naftës kushton 219 lekë, ndërsa pyetja për rikthimin e Bordit të Transparencës është ende pa përgjigje. Nafta është lëndë e parë, pjesë e zinxhirit për një sërë sektorësh, për aktivitetin ekonomik të disa bizneseve dhe për pasojë, një naftë më e shtrenjtë pasohet me çmime e shërbime të tjera më të shtrenjta.

Pas tij renditen:

• Argëtim, sport dhe kulturë: +5.4%

• Sigurime dhe shërbime financiare: +4.6%

• Qira, ujë, energji elektrike, gaz dhe karburante të tjera: +3.7%

• Ushqime dhe pije joalkoolike: +2.8%

• Mobilje, pajisje shtëpie dhe mirëmbajtje e shtëpisë: +2.8%

• Kujdes personal dhe mallra e shërbime të ndryshme: +2.8%

• Pije alkoolike dhe duhan: +2.4%

Në krahun tjetër, disa kategori shënuan ulje çmimesh. Veshjet dhe këpucët u liruan me 3.2%, ndërsa informacioni dhe komunikimi me 1%. Ushqimet japin kontributin më të madh në inflacion. Edhe pse transporti pati rritjen më të fortë të çmimeve, ndikimin më të madh në normën e përgjithshme të inflacionit e dhanë ushqimet dhe pijet joalkoolike, me +0.95 pikë përqindjeje. Transporti kontribuoi me +0.79 pikë përqindjeje, ndërsa grupi “Qira, ujë, energji elektrike, gaz dhe karburante të tjera” shtoi 0.76 pikë përqindjeje.

Kontribute të tjera pozitive erdhën nga:

• mobiljet dhe mirëmbajtja e shtëpisë: +0.19 pikë përqindjeje;

• restorantet dhe shërbimet e akomodimit: +0.13 pikë përqindjeje;

• pijet alkoolike dhe duhani: +0.12 pikë përqindjeje;

• kujdesi personal dhe mallrat e shërbimet e ndryshme: +0.12 pikë përqindjeje;

• argëtimi, sporti dhe kultura: +0.11 pikë përqindjeje;

• arsimi: +0.07 pikë përqindjeje;

• sigurimet dhe shërbimet financiare: +0.07 pikë përqindjeje;

• shëndeti: +0.06 pikë përqindjeje.

Në krahun e kundërt, veshjet dhe këpucët ndikuan në uljen e inflacionit me -0.12 pikë përqindjeje, ndërsa informacioni dhe komunikimi me -0.04 pikë përqindjeje.

Pavarësisht presioneve të reja mbi çmimet, Banka e Shqipërisë vendosi në mbledhjen e saj të fillimit të gushtit të mos ndryshojë normën bazë të interesit. Ajo mbetet në 2.5%. Guvernatori Gent Sejko deklaroi se rritja e inflacionit është ndikuar nga efektet direkte dhe indirekte të shtrenjtimit të naftës në tregjet ndërkombëtare, si edhe nga kërkesa e qëndrueshme për mallra dhe shërbime. Sipas tij, inflacioni vijon të jetë i kontrolluar dhe pranë objektivit të Bankës së Shqipërisë. Megjithatë, në afatin e shkurtër pritet të qëndrojë pranë, por mbi objektiv, përpara se të ulet gradualisht drejt 3% në periudhën afatmesme. Sipas vlerësimit të Bankës Qendrore, goditja që vjen nga tregjet ndërkombëtare pritet të ketë karakter të përkohshëm në ekonominë shqiptare.