Eksperti: Fondet e IPARD III janë të djegura! Të përgatitemi për programin e ri

Programi IPARD III vijon të mbetet i bllokuar për Shqipërinë, ndërsa fermerët kanë humbur mundësinë për të përfituar nga rreth 146 milionë euro financime të parashikuara për zhvillimin e bujqësisë. Eksperti i bujqësisë Ilir Pilku ngre shqetësimin se fondet e programit nuk u aksesuan dhe argumenton se tashmë vëmendja duhet të përqendrohet te zgjidhja e problematikës së krijuar dhe përgatitja për IPARD IV.

“Bujqësia filloi të rritet dhe të reduktojë atë balancën negative tregtare me fillimin në aksesimin e fondeve të Bashkimit Evropian. Nisi që në 2011 dhe kulmoi me IPARD I dhe IPARD II, tani kemi problemin më të madh të bllokimit të fondeve, që akoma ne nuk e kemi zgjidhur me Bashkimin Evropian”, tha Pilku gjatë një interviste televizive. Ai argumenton se tashmë duhet të zgjidhen detyrimet që lidhen me fondet e mëparshme dhe të krijohen kushtet për akreditimin e strukturave përgjegjëse. “Ne na u dogj IPARD III, na ka ngelur vetëm pak muaj për këtë program, sepse mbaron në fund të vitit dhe ne nuk e përfituam. Pra, 146 milion euro ne nuk i aksesuam”, deklaroi ai.

Pilku thotë se përpara kalimit te programet e ardhshme duhet të zgjidhet çështja e fondeve të keqpërdorura dhe të merren masat e nevojshme për rikthimin e besimit të institucioneve europiane. “Duhet të zgjidhim problemin e asaj që kemi kaluar, dhe t’i kthejmë paratë e keqpërdorura, pra duhet të rimbursohet Brukseli, të nxirren të merren masa dhe më pas vijmë tek akreditimi”, thotë eksperti. Ai vlerëson gjithashtu se financimi i munguar europian duhej të ishte kompensuar përmes buxhetit të shtetit, në mënyrë që sektori të mos mbetej pa mbështetje financiare gjatë periudhës së bllokimit të IPARD III.