Shkrihen 15 bashki, Shqipëria kalon në hartën e re me 46 njësi vendore

Kuvendi miratoi me 85 votat e mazhorancës reformën e re administrativo-territoriale, e cila e redukton numrin e bashkive në Shqipëri nga 61 në 46. Ndarja e re u miratua pa konsensus mes dy kampeve politike, me socialistët që mbrojtën bashkimin e njësive vendore dhe opozitën që kundërshtoi këtë model. Sipas variantit të miratuar, 15 bashki do të bashkohen me bashki fqinje, ndërsa numri i qarqeve do të mbetet 12. Mazhoranca argumenton se riorganizimi do të forcojë kapacitetet financiare dhe administrative të pushtetit vendor, si dhe do të përmirësojë ofrimin e shërbimeve për qytetarët. Harta e re parashikon këto ndryshime në organizimin vendor:

• Fushë-Arrëzi bashkohet me Pukën.

• Klosi bashkohet me Matin.

• Rrogozhina bashkohet me Kavajën.

• Dimali dhe Poliçani i bashkohen Beratit.

• Patosi i bashkohet Fierit.

• Divjaka i bashkohet Lushnjës.

• Selenica i bashkohet Vlorës.

• Maliqi i bashkohet Korçës.

• Këlcyra bashkohet me Përmetin.

• Memaliaj bashkohet me Tepelenën.

• Libohova bashkohet me Gjirokastrën.

• Cërriku dhe Belshi i bashkohen Elbasanit.

• Prrenjasi i bashkohet Librazhdit.

Përtej bashkimit të bashkive, reforma parashikon edhe ndryshime në organizimin e brendshëm të tyre. Në strukturën e re përfshihet edhe niveli i “qytetit”, si hallkë ndërmjet bashkisë dhe njësive administrative, me një nënkryetar përgjegjës për koordinimin e shërbimeve. Megjithatë, secila bashki do të ruajë një kryetar, një këshill bashkiak, një administratë dhe një buxhet të vetëm. Sfidë për zbatimin e reformës do të jetë mënyra se si bashkimi i strukturave dhe administratave do të përkthehet në shërbime më të mira dhe më të aksesueshme për banorët e njësive të prekura.