Nafta në nivelet më të larta të 4 muajve, Brent prek 110 dollarë

Çmimi i naftës Brent u ngjit këtë të premte në nivelet më të larta të rreth katër muajve, teksa tregjet po ndjekin me shqetësim zhvillimet në Lindjen e Mesme dhe rrezikun për furnizimin global me energji. Gjatë tregtimit, Brent arriti deri në 109.97 dollarë për fuçi, pas rritjes prej më shumë se 6% në seancën e mëparshme. Më pas, çmimi u tërhoq drejt intervalit 106–107 dollarë, ndërsa nafta mbeti në trajektore për një rritje të fortë javore. Një nga shqetësimet kryesore të tregjeve është Ngushtica e Hormuzit, përmes së cilës kalon rreth 20% e furnizimit global ditor me naftë bruto dhe LNG. Sipas të dhënave paraprake të Kpler, më 10 shtator vetëm 7 anije kaluan nëpër ngushticë, kundrejt një mesatareje prej 15 anijesh në 10 ditët e mëparshme. Në fokus është edhe Bab el-Mandeb, ku përshkallëzimi i tensioneve në Jemen rrit rrezikun për transportin detar dhe furnizimet drejt Europës përmes Detit të Kuq dhe Kanalit të Suezit. Ndërkohë, RBC Capital Markets paralajmëron se një rikthim në konflikt të plotë mes Arabisë Saudite dhe Houthi-ve mund ta çojë Brent-in deri në 121.99 dollarë për fuçi më vonë gjatë vitit. Megjithatë, çmimi u tërhoq nga kulmi i ditës pas raportimeve për përpjekje diplomatike në Lindjen e Mesme për një marrëveshje të përkohshme me Iranin, që do të lehtësonte transportin përmes Hormuzit.