Mijëra legalizime në gusht, ja ku mund ta gjeni dokumentin tuaj

Procesi i legalizimit të ndërtimeve informale ka vijuar edhe gjatë muajit gusht, me 3.245 vendime legalizimi të dhëna nga Agjencia Shtetërore e Kadastrës. Ndryshe nga procedurat tradicionale, qytetarët që kanë përfituar nuk kanë nevojë të paraqiten fizikisht pranë zyrave të Kadastrës për të tërhequr dokumentin. Sipas ASHK-së, vendimi u dërgohet drejtpërdrejt në profilin personal në e-Albania, i pajisur me vulë digjitale dhe nënshkrim elektronik.

Përveç dokumentit që gjendet në llogarinë personale në e-Albania, ASHK ka publikuar edhe listat emërore të qytetarëve përfitues. Këto lista janë bërë publike në faqen zyrtare të Agjencisë, në rubrikën “Afishime”, dhe janë organizuar sipas Drejtorive Vendore përkatëse. Kjo u jep mundësi qytetarëve të verifikojnë nëse emri i tyre është përfshirë në vendimet e legalizimit të miratuara gjatë gushtit.

Sipas procedurës së njoftuar nga ASHK, qytetari që rezulton përfitues mund ta aksesojë vendimin elektronikisht, pa pasur nevojë për një vizitë në sportelet e Kadastrës. Ndërsa listat e publikuara në internet kanë rol informues, dokumenti i legalizimit gjendet në profilin personal të përfituesit në e-Albania. ASHK u bën thirrje qytetarëve që të kontrollojnë si listat e publikuara në rubrikën “Afishime”, ashtu edhe profilet e tyre në e-Albania, për të verifikuar nëse janë përfshirë në vendimet e dhëna gjatë muajit gusht.

"Viti 2025 me 2.6101 legalizime, ka qenë viti më i miri sa i takon legalizimeve që kur është krijuar ASHK, në 2019. Për 6-mujorin e parë të 2026-ës kemi miratuar 17.396 vendime legalizimi, është një numër më i lartë në 2023-2024, dhe do të jetë vit edhe më i mirë se viti 2025. Patjetër, që kemi një numër shumë të madh dosjesh për këtë proces. Afati ligjor në ligj për të mbyllur legalizimet është 2028-ta", deklaroi pak muaj më parë drejtoresha e Kadastrës, Lorena Goxhobelli në raportimin vjetor në komision.

Procesi i legalizimit mbetet një prioritet, pasi ai u garanton qytetarëve siguri ligjore mbi pronën dhe krijon mundësi për zhvillim të qëndrueshëm urban. Gjithashtu, procesi i legalizimeve po vijon pa ndërprerje, me qëllim finalizimin e çdo rasti dhe garantimin e dokumentacionit të plotë ligjor për qytetarët. Legalizimi i objekteve informale jo vetëm që u jep fund pasigurive pronësore për mijëra familje, por krijon edhe mundësi të reja për zhvillim urban, investime dhe rritje të vlerës së pronës.