Kredi me 0% interes për ish-qiramarrësit: këto janë dokumentet që duhen për aplikim

Enti Kombëtar i Banesave ka publikuar informacionin për dokumentacionin që duhet të paraqesin ish-qiramarrësit në ish-pronë private që aplikojnë për kredi me 0% interes. Sipas informacionit të publikuar, aplikimi kryhet përmes platformës e-Albania. Skema synon të mbështesë familjet përfituese për zgjidhjen e strehimit, ndërsa subvencionimi i interesave të kredisë financohet nga Buxheti i Shtetit.

Dokumentet që kërkohen

Nga materialet e publikuara nga Enti Kombëtar i Banesave rezulton se aplikantët duhet të disponojnë disa dokumente që vërtetojnë gjendjen familjare, tatimore, pronësore dhe marrëdhënien e qiramarrjes.

1. Certifikata familjare

Kërkohet certifikata e gjendjes familjare aktuale, e cila shërben për të përcaktuar përbërjen e familjes përfituese.

2. Vërtetim nga organet tatimore

Duhet një vërtetim që konfirmon se asnjë anëtar i familjes përfituese nuk është subjekt i TVSH-së apo biznes i madh.

3. Vërtetim negativ i pronësisë

Kërkohet vërtetim negativ që kryefamiljari dhe anëtarët e familjes, sipas certifikatës familjare të datës 01.12.1992, nuk kanë pasur banesë të regjistruar ose në proces regjistrimi.

4. Dokumentacion për kthimin e pronës

Duhet dokumentacion që provon kthimin e pronës te pronari i ligjshëm. Në materialet e publikuara përmenden, ndër të tjera, vendimi për kthimin e pronës, dokumente nga ish-Ndërmarrja Komunale e Banesave, certifikatë ose vërtetim pronësie, si edhe urdhër ekzekutimi që vërteton kthimin e pronës. Dokumentet duhet të jenë origjinale ose të noterizuara.

5. Dokumentacioni i qiramarrjes

Për të provuar marrëdhënien mes banesës dhe qiramarrësit kërkohen dokumente si kontrata e qiramarrjes, autorizimi ose vendimi i ish-Komitetit Ekzekutiv, akti i dorëzimit të banesës, apo dokument tjetër zyrtar i lëshuar nga ish-Komunale e Banesave. Dokumentacioni duhet të vërtetojë lidhjen mes banesës së kthyer te pronari dhe qiramarrësit. Edhe këto dokumente paraqiten në origjinal ose të noterizuara.

6. Vërtetim për statusin e banorit në ish-pronë private

Kërkohet gjithashtu vërtetim për përfitimin e statusit të banorit në ish-pronë private, të miratuar me vendim të Këshillit Bashkiak përpara vitit 2006. Enti Kombëtar i Banesave u kujton qytetarëve se aplikimi për këtë skemë bëhet online nëpërmjet e-Albania.

Bëhet fjalë për banesa që dikur kanë qenë pronë private e qytetarëve, por gjatë periudhës së regjimit komunist u shtetëzuan dhe u administruan nga shteti. Në këto banesa u vendosën familje si qiramarrëse, zakonisht përmes strukturave shtetërore të strehimit. Pas ndryshimeve të viteve ’90, shteti nisi procesin e kthimit të pronave ish-pronarëve të ligjshëm. Kjo krijoi një problem për familjet që jetonin aty: banesa nuk ishte më pronë e shtetit dhe duhej t’i kthehej pronarit.

Pasi prona i kthehet pronarit të ligjshëm, familja qiramarrëse duhet të gjejë një zgjidhje tjetër për strehimin. Shteti ka parashikuar programe mbështetëse për këto familje, përfshirë kredi të subvencionuar për strehim. Enti Kombëtar i Banesave e përshkruan pikërisht këtë kategori si qytetarë që kanë statusin e “banorit në ish-pronë private” dhe që mund të trajtohen me kredi me 0% interes.