ISSH jep alarmin, sms mashtruese po qarkullon në emër të Sigurimeve Shoqërore

Instituti i Sigurimeve Shoqërore paralajmëron qytetarët se një mesazh SMS që kërkon verifikimin e të dhënave dhe plotësimin e një procedure online nuk është dërguar prej tij. Institucioni u bën thirrje qytetarëve të mos klikojnë linkun. Instituti i Sigurimeve Shoqërore (ISSH) ka njoftuar qytetarët pas qarkullimit të një SMS-je mashtruese në celularët e tyre. Sipas ISSH, mesazhi mban emrin "Sigurimet Shoqërore (ISSH): Një përditësim është në pritje..." dhe shoqërohet me një link të dyshimtë nuk është dërguar nga institucioni. Në njoftimin zyrtar, ISSH thekson: Ju lutemi, mos klikoni në linkun e përfshirë në këtë mesazh dhe mos jepni të dhëna personale. ISSH ka njoftuar institucionet përkatëse për marrjen e masave dhe bllokimin e tij.- përfundon njoftimi i ISSH - së

Si funksionon mashtrimi?

Qytetarët marrin një SMS që i tremb se do t'u preken të drejtat nëse nuk verifikojnë të dhënat. Linku i çon në një faqe false, identike me e-Albania ose ISSH, ku kërkohet të vendoset numri personal, fjalëkalimi i e-Albania-s dhe të dhënat bankare. Qëllimi është vjedhja e identitetit dhe e llogarive. ISSH kërkon nga qytetarët që ta shpërndajnë njoftimin për të informuar edhe familjarët, veçanërisht të moshuarit, të cilët janë më të rrezikuarit nga ky lloj mashtrimi.