Hekurudha Tiranë-Durrës-Rinas në fazën e fundit, qeveria kërkon operator për transportin e udhëtarëve

Hekurudha shqiptare po hyn në një fazë të re, ku krahas investimeve në infrastrukturë, qeveria synon të përcaktojë edhe mënyrën se si do të ofrohet shërbimi për pasagjerët. Ministri i Infrastrukturës dhe Energjisë, Enea Karakaçi, bëri të ditur nisjen e konsultimit për Kontratën e Shërbimit Publik për transportin hekurudhor të udhëtarëve në korridorin Tiranë-Durrës-Aeroporti i Rinasit. Sipas ministrit, kontrata do të përcaktojë kuadrin për operimin e shërbimit dhe do të hapë rrugën për përfshirjen e operatorëve privatë dhe ndërkombëtarë. “Kontrata e Shërbimit Publik për korridorin e parë tashmë Tiranë-Aeroport-Durrës synon të krijojë kuadrin kontraktual për ofrimin e shërbimit të transportit hekurudhor të udhëtarëve, duke përcaktuar qartë detyrimin e shërbimit publik, standardet e shërbimit, përgjegjësinë e operatorit dhe mekanizmin e kompensimit”, deklaroi Karakaçi.

Ministri bëri të ditur se shteti do të përcaktojë nevojën dhe standardet e shërbimit, ndërsa operatori do të përzgjidhet përmes një procedure konkurruese. “Ky është një ndryshim i rëndësishëm në mënyrën se si e konceptojmë transportin hekurudhor. Shteti përcakton tashmë nevojën dhe standardin e shërbimit publik, ndërsa përmes një procedure konkurruese kërkohet nga tregu të gjendet zgjidhja më e përshtatshme për operimin e këtij shërbimi”, tha ai. Kontrata pritet të përcaktojë një sërë elementësh të operimit, duke nisur nga numri i tren-kilometrave dhe oraret, deri te mjetet lëvizëse, financimi, mirëmbajtja dhe përdorimi i depos në Shkozet. Në dokument do të përcaktohen gjithashtu modeli i pronësisë ose leasing-ut të mjeteve, periudha e mobilizimit, kohëzgjatja e kontratës, mekanizmi i kompensimit dhe indeksimit, mënyra e trajtimit të të ardhurave nga biletat dhe treguesit e performancës. Sipas Karakaçit, qëllimi nuk është thjesht rikthimi i shërbimit hekurudhor, por krijimi i një shërbimi të matshëm dhe të orientuar drejt pasagjerëve.

Projekti Tiranë-Durrës-Aeroporti i Rinasit është pjesë e programit të investimeve për rehabilitimin dhe modernizimin e rrjetit hekurudhor shqiptar. Projekti përfshin rehabilitimin e linjës ekzistuese, lidhjen e re me aeroportin, ndërtimin e stacioneve dhe elektrifikimin. Sipas ministrit, punimet për rehabilitimin e linjës dhe stacionet janë drejt përfundimit, ndërsa elektrifikimi parashikohet të përfundojë brenda vitit 2027. Qëllimi është që infrastruktura e re të shoqërohet me një shërbim të rregullt dhe të besueshëm për udhëtarët, duke e lidhur Tiranën me Durrësin dhe Aeroportin e Rinasit.

Investimet nuk kufizohen vetëm te linja hekurudhore Tiranë-Durrës-Rinas. Në veri, linja Vorë-Hani i Hotit, me gjatësi rreth 120 kilometra, po rehabilitohet si pjesë e lidhjes së Shqipërisë me Malin e Zi dhe rrjetin europian. Sipas ministrit, vlerësimi i ofertave është në fazën përfundimtare dhe fituesi pritet të shpallet brenda këtij viti. Një tjetër projekt i rëndësishëm është Durrës-Rrogozhinë, pjesë e rrjetit kryesor TEN-T në Ballkanin Perëndimor dhe e Korridorit VIII.Linja do të rehabilitohet për të mundësuar shpejtësi projektimi deri në 120 km/orë, ndërsa parashikohen edhe stacione të modernizuara dhe sisteme të reja sinjalizimi e telekomunikacioni. Edhe për këtë projekt, sipas Karakaçit, procesi konkurrues është përmbyllur dhe shpallja e fituesit pritet brenda vitit.

Në vijim janë në përgatitje edhe projektet Rrogozhinë-Pogradec dhe rehabilitimi i linjës Rrogozhinë-Fier-Vlorë, së bashku me lidhjen hekurudhore me Aeroportin e Vlorës. Në strategjinë e qeverisë përfshihet edhe projekti hekurudhor Durrës-Prishtinë. Ministri tha se, në bashkëpunim me Agjencinë Franceze të Zhvillimit, po punohet për përgatitjen e një projekti të detajuar teknik. Në të njëjtën kohë, qeveria po planifikon edhe forcimin e transportit hekurudhor të mallrave. Lidhja Sukth-Porto Romano synon të krijojë një lidhje të drejtpërdrejtë hekurudhore me portin e ri dhe të forcojë transportin ndërmodal mes hekurudhës dhe transportit detar.