Erjon Vishkulli në Itali për operacionin e syrit, fatura mbulohet nga shteti shqiptar

Erjon Vishkulli, 28-vjeçari nga Elbasani që mbeti i plagosur rëndë në sy gjatë protestës së 24 tetorit në Tiranë, është dërguar në Itali për trajtim të specializuar, ku pritet t’i nënshtrohet këtë të hënë një ndërhyrjeje të dytë kirurgjikale. Transporti dhe shpenzimet e trajtimit, sipas deklaratave të Kryeministrit Edi Rama dhe vëllait të të riut, do të mbulohen nga shteti shqiptar. Plagosja ndodhi gjatë përplasjeve mes protestuesve dhe Policisë. 28-vjeçari u godit në sy nga një plumb gome, ndërsa rrethanat e sakta të ngjarjes mbeten objekt verifikimi.

Pas ngjarjes, Vishkulli u transportua në Spitalin Universitar të Traumës, ku iu nënshtrua një ndërhyrjeje kirurgjikale urgjente. Pas konsultave mes specialistëve të Traumës dhe mjekëve të Qendrës Spitalore Universitare “Nënë Tereza”, u vendos që trajtimi të vijonte në një klinikë të specializuar në Itali, për shkak të kompleksitetit të dëmtimit.

Shefja e Shërbimit të Okulistikës në QSUT, prof. Vilma Mema, bëri të ditur se gjendja e të riut ishte stabilizuar pas ndërhyrjes së parë, por se nevojitej një tjetër operacion për trajtimin e dëmtimit të syrit. Ecuria e shikimit do të mund të vlerësohet më qartë pas ndërhyrjes dhe kontrolleve të mëtejshme. I mbërritur në Itali, Vishkulli njoftoi se do t’i nënshtrohej një operacioni të specializuar. Ndërkohë, vëllai i tij, Emiljano Vishkulli, deklaroi se gjendja shëndetësore ishte më e stabilizuar dhe se familja kishte marrë sinjale inkurajuese nga mjekët për mundësinë e rikuperimit të syrit.

Përveç gjendjes shëndetësore të 28-vjeçarit, vëmendja është përqendruar edhe te kostoja e trajtimit jashtë vendit. Edhe pse shuma e saktë nuk është bërë publike, fatura mund të përfshijë disa zëra të rëndësishëm: ndërhyrjen kirurgjikale, ekzaminimet e specializuara, qëndrimin në spital, ndjekjen pas operacionit dhe transportin drejt Italisë. Një ndërhyrje e specializuar në sy mund të kushtojë disa mijëra euro, ndërsa shtrimi, ekzaminimet dhe trajtimi pas operacionit mund ta rrisin më tej faturën. Përllogaritjet për operacionin dhe trajtimin mund të nisin nga rreth 3 mijë deri në 10 mijë euro ose më shumë, në varësi të procedurës dhe kompleksitetit të rastit.