Aeroporti i Tiranës thyen rekordet, 6 milionë pasagjerë në 6 muaj

Aeroporti Ndërkombëtar i Tiranës vijon të zgjerojë trafikun ajror, duke u renditur në krye të aeroporteve të rajonit për numrin e pasagjerëve gjatë gjashtëmujorit të parë të vitit 2026. Sipas kryeministrit Edi Rama, gjatë gjashtë muajve të parë të këtij viti në aeroport kanë udhëtuar rreth 6 milionë pasagjerë, një shifër që përfaqëson një rritje prej 17% krahasuar me të njëjtën periudhë të vitit 2025.

“6 milionë pasagjerë në vetëm 6 muaj, me një rritje prej 17% krahasuar me të njëjtën periudhë të vitit 2025”, deklaroi Rama në një postim në rrjetet sociale.

rritja e trafikut është nxitur nga shtimi i fluturimeve dhe destinacioneve, si dhe nga fluksi në rritje i turistëve që zgjedhin Shqipërinë. Tendenca është intensifikuar gjatë sezonit veror. Më 17 gusht, Aeroporti i Tiranës shënoi një rekord historik, me 60,291 pasagjerë dhe 326 lëvizje avionësh brenda një dite. Ndërkohë, vetëm gjatë muajit gusht, në aeroport u regjistruan rreth 1.7 milionë pasagjerë, duke e bërë një nga muajt më të ngarkuar në historinë e transportit ajror në vend. Shifrat tregojnë zgjerimin e lidhjeve ajrore të Shqipërisë me tregjet ndërkombëtare dhe rritjen e kërkesës turistike. Ecuria e trafikut e pozicionon Aeroportin Ndërkombëtar të Tiranës si një prej nyjeve kryesore të transportit ajror në rajon, ndërsa rritja e numrit të pasagjerëve pritet të vijojë të ndikojë edhe në sektorët e turizmit, transportit dhe ekonomisë.