Turqia investon 111 milionë euro në Shqipëri, Ibrahimaj: Të rrisim eksportet dhe tregtinë rajonale

Ministrja e Ekonomisë dhe Inovacionit, Delina Ibrahimaj, ka kërkuar forcimin e bashkëpunimit ekonomik mes vendeve të Ballkanit Perëndimor, me qëllim rritjen e tregtisë dhe tërheqjen e investimeve të reja.

Gjatë Forumit të Biznesit Ballkanik, të organizuar në Tiranë nga Dhoma e Tregtisë dhe Industrisë Shqipëri–Turqi (ATTSO), Ibrahimaj theksoi se bashkimi i kapaciteteve dhe shfrytëzimi i avantazheve konkurruese mund t’i bëjnë ekonomitë e rajonit më tërheqëse për investitorët ndërkombëtarë.

Turqia mbetet një nga partnerët kryesorë tregtarë të Shqipërisë, duke zënë 7,3% të volumit të përgjithshëm tregtar të vendit në vitin 2025. Megjithatë, shkëmbimet tregtare dominohen nga importet, ndaj ministrja nënvizoi nevojën për të rritur eksportet shqiptare drejt tregut turk. Sipas Ibrahimajt, investimet turke në Shqipëri arritën në rreth 111 milionë euro gjatë gjashtëmujorit të parë të vitit 2026. Ajo u bëri thirrje kompanive turke që të shkojnë përtej marrëdhënieve tregtare, duke investuar drejtpërdrejt në sektorë të ndryshëm të ekonomisë shqiptare. Ministrja theksoi gjithashtu rëndësinë e krijimit të një tregu të përbashkët rajonal, i cili do të ndihmonte në uljen e barrierave, shkurtimin e kohës së të bërit biznes dhe rritjen e konkurrueshmërisë përpara integrimit në tregun e përbashkët evropian. Në këtë kuadër, Ibrahimaj shprehu pritshmërinë që komisioni i përbashkët Shqipëri–Turqi të konkretizojë brenda këtij viti nisma dhe plane të reja për zgjerimin e marrëdhënieve ekonomike mes dy vendeve.