Qeveria "hap thesin", miliona lekë për kompensimin e pronarëve të prekur nga legalizimi

Këshilli i Ministrave ka miratuar një tjetër masë në kuadër të procesit të përfundimit të problematikave të pronësisë që lidhen me ndërtimet informale të legalizuara. Në fokus të vendimit janë pronarët e pasurive të paluajtshme private, tokat e të cilëve janë prekur nga objektet që kanë kaluar procesin e legalizimit.

Sipas vendimit, për kompensimin financiar është përcaktuar një vlerë totale prej 840 702 155,51 lekësh, e cila do të shpërndahet për një sipërfaqe prej 61 477,13 metrash katrorë.

Kjo do të thotë se, në nivel të përgjithshëm, kompensimi i përcaktuar nga vendimi rezulton në rreth 13 675 lekë për metër katror, megjithëse vlera konkrete për secilin përfitues përcaktohet sipas të dhënave dhe pasurive të përfshira në listën bashkëlidhur vendimit.

Masa e re prek një numër të konsiderueshëm zonash në të gjithë vendin. Në listë përfshihen drejtoritë vendore të Agjencisë Shtetërore të Kadastrës në:

• Tiranë Veri;

• Tiranë Jug;

• Tiranë Rurale 1;

• Tiranë Rurale 2;

• Kamzë-Vorë;

• Elbasan;

• Shkodër;

• Pogradec;

• Lezhë;

• Fier;

• Vlorë;

• Durrës-Kavajë-Krujë;

• Sarandë;

• Zonat e Stimuluara;

• Kukës;

• Gjirokastër;

• Berat.

Kompensimi lidhet me sipërfaqet private të zëna nga ndërtime që tashmë janë përfshirë në procesin e legalizimit. Sipas përcaktimeve të qeverisë, të ardhurat që arkëtohen nga drejtoritë vendore të Kadastrës si rezultat i kalimit të pronësisë përmes shitjes së parcelave ndërtimore do të përdoren për kompensimin e pronarëve.

Kjo procedurë përfshin si pasuritë shtetërore, ashtu edhe pasuritë e të tretëve, kur ato lidhen me objektet informale që kalojnë në procesin e legalizimit.

Vendimi përcakton gjithashtu një kategori të veçantë pasurish për të cilat fondet e kompensimit do të vihen në dispozicion nga Agjencia e Trajtimit të Pronave. Në këtë grup përfshihen një numër i përcaktuar pasurish, të identifikuara me numrat rendorë në shtojcën e vendimit. Për këto raste, kompensimi do të realizohet në përputhje me dispozitat e nenit 24 të ligjit nr. 20/2020, “Për përfundimin e proceseve kalimtare të pronësisë në Republikën e Shqipërisë”.

Shtojca e vendimit përmban të dhënat konkrete për pasuritë dhe shumat përkatëse, duke shërbyer si pjesë integrale e aktit të miratuar nga qeveria. Për zbatimin e vendimit janë ngarkuar Agjencia Shtetërore e Kadastrës dhe Agjencia e Trajtimit të Pronave. Drejtoritë vendore të Kadastrës në zonat e përcaktuara duhet të kryejnë edhe ndryshimet përkatëse në regjistrat e pasurive të paluajtshme.

Vendimi hyn në fuqi menjëherë pas miratimit dhe parashikohet të botohet në “Fletoren zyrtare”.

Në këtë mënyrë, qeveria synon të vijojë procesin e trajtimit financiar të pronarëve që kanë humbur përdorimin e sipërfaqeve të tyre si pasojë e ndërtimeve informale të cilat më pas janë legalizuar.