Mbërrijnë 665 turistë me kroçierën "Nautica"

Porti i Durrësit mirëpriti sot anijen turistike “Nautica”, e cila solli në Shqipëri 665 turistë nga vende të ndryshme të botës, kryesisht nga Shtetet e Bashkuara të Amerikës, Mbretëria e Bashkuar, Kanadaja dhe Australia. Mbërritja e kroçieres përforcon pozicionin e Durrësit si një nga portat kryesore të turizmit detar në rajon.

Sipas operatorëve turistikë, çdo ndalesë e një anijeje kroçiere sjell përfitime ekonomike që shtrihen përtej qytetit pritës, pasi turistët vizitojnë edhe destinacione të tjera kulturore dhe historike në vend.

Anija “Nautica”, me gjatësi 181 metra dhe pjesë e flotës së Oceania Cruises, vijon itinerarin e saj mesdhetar, ndërsa ndalesa në Durrës dëshmon rritjen e interesit të kompanive ndërkombëtare për portet shqiptare.

Me mbërritjet e njëpasnjëshme të kroçierave gjatë sezonit veror, pritet të rritet fluksi i vizitorëve dhe të forcohet kontributi i turizmit në ekonominë shqiptare. Ekspertët vlerësojnë se zhvillimi i turizmit të kroçierave mund të shndërrohet në një motor të rëndësishëm të rritjes ekonomike, duke nxitur investime të reja në infrastrukturën portuale dhe në sektorin e shërbimeve.