Kush është taksa/tatimi që mbajnë buxhetin këtë 5-mujor?

Buxheti i shtetit ka regjistruar një performancë pozitive gjatë pesë muajve të parë të vitit 2026, me të ardhurat që kanë tejkaluar planin dhe shpenzimet që kanë mbetur nën parashikime. Sipas Ministrisë së Financave, të ardhurat totale për periudhën janar-maj arritën në 340.5 miliardë lekë, me një realizim prej 105.3% të planit dhe 11.2% më shumë krahasuar me të njëjtën periudhë të vitit të kaluar.

Rritja është mbështetur kryesisht nga performanca e administratës tatimore, ku të ardhurat nga TVSH-ja në vend, tatimi mbi të ardhurat personale dhe fondet speciale kanë shënuar rezultate mbi plan. Veçanërisht, të ardhurat nga tatimi mbi të ardhurat personale u rritën me 18.1%, ndërsa TVSH-ja neto e arkëtuar në vend u rrit me 17.6% krahasuar me pesëmujorin e vitit 2025.

Nga ana tjetër, të ardhurat doganore u rritën me 2.7% në bazë vjetore, megjithëse disa zëra, si renta minerare dhe akcizat, mbetën nën objektivat e planifikuara.

Ndërkohë, shpenzimet publike arritën në 286.8 miliardë lekë, me një realizim prej 96.8% të planit. Krahasuar me një vit më parë, ato u rritën me 7.4%, duke reflektuar shtimin e shpenzimeve korente dhe kapitale. Investimet publike shënuan një rritje prej 9.4%, duke arritur në 25.9 miliardë lekë dhe duke tejkaluar planin me 3%.

Si rezultat i ritmit më të lartë të të ardhurave krahasuar me shpenzimet, financat publike paraqiten në një pozicion të qëndrueshëm gjatë pesëmujorit të parë të vitit, duke krijuar hapësira më të mëdha për financimin e investimeve dhe përballimin e detyrimeve buxhetore.