Kultura në 2025, mbi 1.5 milionë vizitorë në institucionet e trashëgimisë kulturore

Aktiviteti kulturor në Shqipëri është zgjeruar gjatë vitit 2025, duke reflektuar rritjen e pjesëmarrjes së publikut, interesit ndërkombëtar dhe vizitave në institucionet e trashëgimisë kulturore.

Sipas të dhënave zyrtare, gjatë vitit janë organizuar 1.272 shfaqje dhe premiera në institucionet qendrore të artit, të ndjekura nga 171.607 spektatorë. Paralelisht, në vend janë zhvilluar 314 aktivitete kulturore me pjesëmarrje ndërkombëtare, ku morën pjesë gjithsej 261.654 persona.

Kosova, vendet e Bashkimit Evropian dhe Arabia Saudite kryesuan për numrin e aktiviteteve dhe pjesëmarrësve, ndërsa në total 428 artistë të huaj u angazhuan në veprimtari kulturore në Shqipëri. Artistët nga Arabia Saudite përbënin 29,7% të totalit, të ndjekur nga ata nga Kosova me 11,7% dhe Italia me 9,8%.

Një nga treguesit më pozitivë ishte rritja e numrit të vizitorëve në institucionet e trashëgimisë kulturore. Gjatë vitit 2025 ato u vizituan nga 1.523.587 persona, ose 15,9% më shumë krahasuar me vitin 2024, duke dëshmuar interesin në rritje për turizmin kulturor dhe historinë e vendit.

Edhe arsimi i lidhur me kulturën mbetet tërheqës për të rinjtë. Në vitin akademik 2025-2026, në programet e studimit të lidhura me kulturën janë regjistruar 16.111 studentë, ku fusha e Arkitekturës dhe Ndërtimit rezulton më e preferuara me 6.119 studentë.

Ndërkohë, sektori kulturor vijon të japë kontribut në ekonomi dhe tregun e punës. Në aktivitetet dhe profesionet e lidhura me kulturën janë të punësuar 33.893 persona, ose 3% e totalit të të punësuarve në vend.

Nga ana tjetër, çmimet e mallrave dhe shërbimeve kulturore kanë pësuar rritje të moderuar gjatë vitit, me kategorinë e librave që shënoi rritjen më të lartë prej 2,9%.

Shpenzimet publike për argëtim, kulturë dhe çështje fetare përbëjnë 1,65% të totalit të shpenzimeve publike dhe rreth 0,5% të Prodhimit të Brendshëm Bruto, duke nënvizuar rolin që sektori kulturor vijon të luajë në zhvillimin social dhe ekonomik të vendit.