FMN vlerëson ekonominë shqiptare, por paralajmëron për pasiguritë globale

Ekonomia shqiptare vijon të shfaqë qëndrueshmëri dhe perspektiva pozitive rritjeje, pavarësisht sfidave të mjedisit ndërkombëtar. Ky ishte vlerësimi i misionit të Fondit Monetar Ndërkombëtar gjatë vizitës së zhvilluar në Tiranë, ku u diskutuan zhvillimet makroekonomike, politika monetare dhe stabiliteti financiar i vendit.

Sipas Bankës së Shqipërisë, rritja ekonomike ka mbështetur zgjerimin e punësimit dhe rritjen e pagave, ndërsa tregues të rëndësishëm si inflacioni, borxhi publik, borxhi i jashtëm dhe niveli i kredive me probleme kanë shënuar përmirësim. FMN vlerësoi gjithashtu kushtet e favorshme financiare dhe performancën pozitive të tregut të punës, duke theksuar se perspektiva ekonomike mbetet përgjithësisht e favorshme.

Misioni i FMN-së mbështeti qëndrimin e Bankës së Shqipërisë në politikën monetare, duke e konsideruar atë të përshtatshme për ruajtjen e stabilitetit të çmimeve. Sa i përket kursit të këmbimit, FMN konfirmoi se forcimi i lekut lidhet me përmirësimet strukturore të ekonomisë dhe se regjimi i lirë i kursit të këmbimit sjell përfitime për ekonominë shqiptare.

Fondi Monetar Ndërkombëtar vlerësoi qëndrueshmërinë e ekonomisë shqiptare, performancën pozitive të tregut të punës dhe kushtet e favorshme financiare, duke nënvizuar se perspektiva ekonomike mbetet pozitive, pavarësisht pasigurive nga zhvillimet ndërkombëtare dhe tensionet gjeopolitike.

Në fokus të diskutimeve ishte edhe sektori bankar, i cili u vlerësua si i qëndrueshëm dhe i mirëkapitalizuar, me likuiditet të lartë, cilësi të mirë të portofolit të kredisë dhe rezultate të kënaqshme financiare. Ndërkohë, palët diskutuan edhe sfidat afatgjata që lidhen me zhvillimet demografike, rritjen e produktivitetit dhe procesin e integrimit evropian të Shqipërisë.