Doganat ndryshojnë mënyrën e vlerësimit të makinave, kilometrat hyjnë në llogaritjen e çmimit

Administrata Doganore ka prezantuar manualin e ri për procedurën e vlerësimit të automjeteve në zhdoganim, duke sjellë si një nga ndryshimet kryesore marrjen në konsideratë të kilometrave të përshkuara nga automjeti.

Sipas Doganave, manuali synon të përcaktojë në mënyrë sa më reale dhe objektive vlerën e automjeteve të prodhuara gjatë 10 viteve të fundit, por vetëm në rastet kur nuk mund të zbatohet metoda e vlerësimit sipas transaksionit, në përputhje me nenet 66–69 të Kodit Doganor. Në këto raste, Administrata Doganore do t’u referohet çmimeve reale të publikuara online në burime dhe buletine të specializuara, të përcaktuara në manual. Risia kryesore lidhet me kilometrat. Përveç të dhënave teknike të automjetit, në vlerësim do të merret parasysh edhe numri i kilometrave të përshkuara deri në momentin e zhdoganimit. Ky element synon të diferencojë automjetet që, pavarësisht se kanë të njëjtën markë, vit prodhimi, cilindratë dhe lloj karburanti, kanë një përdorim të ndryshëm dhe rrjedhimisht edhe vlerë të ndryshme në treg. Doganat sqarojnë se të dhënat e marra nga burimet e përcaktuara do të përdoren vetëm kur nuk mund të zbatohen metodat e tjera të vlerësimit, sipas rendit të përcaktuar 1–5. Manuali nuk ndryshon mënyrën e vlerësimit për automjetet më të vjetra se 10 vjet. Administrata Doganore thekson gjithashtu se qëllimi i manualit nuk është rritja e të ardhurave nga zhdoganimi, por një vlerësim më i drejtë dhe i mbështetur në të dhëna reale. Në praktikë, përfshirja e kilometrave synon të shmangë trajtimin e njëjtë fiskal të automjeteve me karakteristika teknike të ngjashme, por me diferenca të konsiderueshme në përdorim. Sipas Doganave, në këtë mënyrë detyrimet synohet të shpërndahen në mënyrë më të drejtë dhe vlera doganore të pasqyrojë më mirë karakteristikat dhe gjendjen konkrete të automjetit në momentin e zhdoganimit.

ma riformulo