Bashkitë, më pak tendera në 2026, por fondi limit rritet me 79%

Njësitë e qeverisjes vendore kanë zhvilluar më pak procedura prokurimi gjatë 6-mujorit të parë të vitit 2026, por vlera e fondeve të parashikuara për tendera është rritur ndjeshëm.

Sipas analizës së Open Data Albania, gjatë periudhës janar–qershor 2026 janë shpallur gjithsej 1,877 procedura prokurimi, me një fond limit total prej 24.95 miliardë lekësh.

Në të njëjtën periudhë të vitit 2025, numri i procedurave të shpallura ishte 1,912, ndërsa fondi limit arrinte në 13.92 miliardë lekë.

Krahasuar me një vit më parë, numri i tenderave është ulur me 35 procedura, ndërsa fondi limit është rritur me rreth 11.03 miliardë lekë, ose 79.2%.

Kjo do të thotë se gjatë 6-mujorit të parë të këtij viti, njësitë vendore kanë planifikuar të prokurojnë një vlerë dukshëm më të lartë fondesh përmes një numri më të vogël procedurash. Mesatarisht, fondi i parashikuar për çdo procedurë është rritur ndjeshëm krahasuar me vitin e kaluar.

Analiza e Open Data Albania përfshin gjithashtu shpërndarjen e fondit limit sipas bashkive dhe procedurat e identifikuara me indikatorë risku “Red Flag” nga platforma Open Procurement Albania.

Sipas organizatës, të dhënat për indikatorët e riskut pasqyrojnë situatën në momentin e analizës dhe klasifikimi i procedurave mund të ndryshojë deri në përfundimin e procesit të vlerësimit dhe finalizimin e tenderave.

Rritja e konsiderueshme e fondeve të prokuruara përmes një numri më të ulët procedurash e bën të nevojshme një vëmendje më të madhe ndaj mënyrës së shpërndarjes së fondeve publike, nivelit të konkurrencës dhe indikatorëve të mundshëm të riskut në tenderat vendorë.