Sejko jep sinjalin: Më shumë kredi për biznesin

Guvernatori i Bankës së Shqipërisë, Gent Sejko, zhvilloi një takim me Francis Malige, Drejtor Menaxhues për Institucionet Financiare në BERZH, ku diskutimet u përqendruan te zhvillimet e sektorit bankar, kreditimi i ekonomisë dhe procesi i integrimit të kuadrit rregullator shqiptar me atë të Bashkimit Europian.

Një nga çështjet kryesore të diskutimit ishte zgjerimi i kreditimit, veçanërisht për sektorin privat. Sipas Sejkos, sistemi bankar shqiptar vijon të ketë nivele të qëndrueshme kapitalizimi dhe likuiditeti, çka krijon hapësirë për të mbështetur më tej aktivitetin ekonomik përmes financimit. Por zgjerimi i kredisë nuk shihet thjesht si një çështje sasie. Qëndrueshmëria e portofolit të kredive dhe administrimi i rrezikut mbeten elemente thelbësore, në mënyrë që rritja e financimit të mos shoqërohet me përkeqësim të cilësisë së kredive.

Një tjetër pikë e rëndësishme e takimit ishte programi i Bankës së Shqipërisë për financimin e bizneseve mikro dhe të vogla. Synimi është përmirësimi i aksesit të këtyre subjekteve në financim dhe krijimi i mundësive për investime të reja. Për këtë kategori biznesesh, qasja në kredi shpesh është më e vështirë sesa për kompanitë e mëdha, për shkak të madhësisë, garancive dhe kapacitetit financiar. Pikërisht për këtë arsye, programi synon të krijojë mekanizma që ta bëjnë financimin më të arritshëm për sipërmarrjet e vogla. BERZH ka shprehur gatishmërinë për të mbështetur Bankën e Shqipërisë dhe për të shqyrtuar mundësi konkrete bashkëpunimi për zbatimin e kësaj nisme.

Takimi nuk u kufizua vetëm te kreditimi. Një pjesë e rëndësishme e diskutimeve lidhej me përafrimin e kuadrit rregullator dhe mbikëqyrës bankar shqiptar me standardet e Bashkimit Europian. Për Bankën e Shqipërisë, përafrimi nuk lidhet vetëm me ndryshimin e rregullave, por edhe me përmirësimin e praktikave të mbikëqyrjes dhe forcimin e qëndrueshmërisë së sistemit financiar. Në diskutime është përfshirë edhe Agjencia e Sigurimit të Depozitave. Fokusi është te forcimi i mekanizmave të sigurisë financiare dhe rritja e kapaciteteve institucionale, me mbështetjen e ekspertizës dhe asistencës së BERZH-it.